رواں مالی سال کے پہلے پانچ ماہ میں حکومت نے 858 ارب روپے کا قرض حاصل کر لیا

حکومت نے رواں مالی سال کے دوران جولائی سے نومبر تک مجموعی طور پر 858 ارب روپے کا قرض حاصل کیا ہے، جو گزشتہ مالی سال کے اسی عرصے کے مقابلے میں نمایاں اضافہ ظاہر کرتا ہے۔

دستاویزی اعداد و شمار کے مطابق صرف نومبر کے مہینے میں 144 ارب روپے کا نیا قرض لیا گیا، جبکہ گزشتہ مالی سال کے جولائی تا نومبر کے دوران مجموعی طور پر 741 ارب روپے کا قرض حاصل کیا گیا تھا۔

 اس طرح رواں مالی سال کے ابتدائی پانچ ماہ میں قرض کا حجم پچھلے سال کے مقابلے میں 117 ارب روپے زیادہ رہا۔

رپورٹ کے مطابق نومبر میں اکتوبر 2025 کے مقابلے میں 4 کروڑ ڈالر اضافی قرض حاصل کیا گیا۔

 نومبر کے دوران باہمی اور کثیرالجہتی معاہدوں کے تحت 31 کروڑ 45 لاکھ ڈالر حاصل کیے گئے، جبکہ 19 کروڑ 69 لاکھ ڈالر کے نیا پاکستان سرٹیفکیٹس بھی جاری کیے گئے۔

اعداد و شمار کے مطابق جولائی میں 198 ارب روپے، اگست میں 192 ارب روپے، ستمبر میں 124 ارب روپے اور اکتوبر میں 133 ارب روپے کا قرض حاصل کیا گیا۔

اقتصادی امور ڈویژن کے مطابق قرضوں میں یہ اضافہ حکومتی مالی ضروریات پوری کرنے اور جاری ترقیاتی منصوبوں کی تکمیل کے لیے کیا گیا ہے۔