خدام الحجاج کی بھرتی میں مبینہ بے ضابطگی، سرکاری ملازمین نے وزیرِ اعظم پورٹل پر شکایات کر دیں

آئندہ سال حج کے لیے خدام الحجاج کی بھرتی کے دوران سرکاری ملازمین نے میرٹ کی خلاف ورزیوں کی شکایات کر دیں۔

شکایات کے مطابق این ٹی ایس ٹیسٹ میں سنگین بے ضابطگیاں ہوئی ہیں، جن میں فزیکل ٹیسٹ کے بغیر میرٹ لسٹ آویزاں کر کے نئے امیدواروں کے حقوق ضائع کیے گئے۔

 متعدد امیدواروں نے وزیرِ اعظم شکایت پورٹل پر درخواستیں جمع کروائی ہیں، جن میں نئے اور میرٹ کے مطابق امیدواروں کے انتخاب کی استدعا کی گئی ہے۔

ذرائع کے مطابق 20 دسمبر کی شب رزلٹ اپلوڈ ہونے کے چند منٹ بعد مخصوص امیدواروں کو سلیکشن کا پیغام موصول ہو گیا، جبکہ کامیاب امیدواروں کے فزیکل ٹیسٹ بھی حذف کر دیے گئے۔

ترجمان وزارت مذہبی امور نے وضاحت کرتے ہوئے کہا کہ ہر سال 70 فیصد پرانے اور 30 فیصد نئے افراد شامل کیے جاتے ہیں اور تمام صوبوں کو آبادی کے تناسب سے کوٹہ دیا جاتا ہے۔