وزیراعظم شہباز شریف: افواج پاکستان نے بھارت کو کبھی نہ بھولنے والا سبق سکھایا

وزیراعظم شہباز شریف نے مظفرآباد میں طلبہ میں لیپ ٹاپ تقسیم کرنے کی تقریب سے خطاب کرتے ہوئے کہا کہ افواج پاکستان نے بھارت کو وہ سبق سکھایا ہے جو وہ کبھی نہیں بھولے گا۔

وزیراعظم نے کہا کہ مئی میں ہونے والی جنگ کے دوران آزاد کشمیر کے لوگ افواج پاکستان کی کامیابی کے لیے دعاگو تھے اور مقبوضہ کشمیر میں ہمارے بھائی بہن قربانیاں دے رہے ہیں۔

 انہوں نے یقین دلایا کہ وہ دن جلد آئے گا جب کشمیر پاکستان کا حصہ بنے گا اور مقبوضہ کشمیر آزاد ہوگا۔

وزیراعظم نے طلبہ کو دیئے جانے والے لیپ ٹاپ کو محض مشین نہیں بلکہ وژن قرار دیا اور کہا کہ یہ ہمیشہ میرٹ پر دیے گئے ہیں، نہ کہ سفارش پر۔

انہوں نے کہا کہ وقت آگیا ہے کہ محنت کے ذریعے پاکستان کو ایک عظیم ملک بنایا جائے۔

اس موقع پر امیر مقام نے کہا کہ وزیراعظم کی قیادت میں دفاعی اور سفارتی محاذ پر کامیابیاں حاصل ہوئی ہیں اور حکومت کی مسلسل محنت سے پاکستان کا عالمی وقار بلند ہوا۔

وزیراعظم آزاد کشمیر فیصل ممتاز راٹھور نے کہا کہ لیپ ٹاپ نوجوان نسل کے لیے رابطے کا ذریعہ ہے اور ہمیں مثبت کردار ادا کرنا چاہیے۔