خواجہ آصف کا کہنا ہے: عمران خان کی سیاست میں ذاتی مفاد اولین ترجیح

وفاقی وزیر دفاع خواجہ آصف نے کہا ہے کہ پاکستان تحریک انصاف کے سربراہ عمران خان اپنی سیاست میں ہمیشہ ذاتی مفاد کو فوقیت دیتے ہیں اور اس کے حصول کے لیے کسی بھی حد تک جا سکتے ہیں۔

سماجی رابطوں کے پلیٹ فارم ایکس (سابقہ ٹوئٹر) پر اپنے بیان میں خواجہ آصف نے کہا کہ وزیراعظم مسلسل پی ٹی آئی کو مذاکرات کی دعوت دے رہے ہیں اور دعا ہے کہ یہ مذاکرات مثبت اور نتیجہ خیز ثابت ہوں، لیکن عمران خان کے سیاسی طرز عمل میں مذاکرات کی گنجائش کم ہی موجود ہے۔

وزیر دفاع کے مطابق عمران خان اپنی پوری زندگی میں ذاتی مفاد کو مدنظر رکھتے ہوئے اصولوں یا انسانی رشتوں کو بھی پس پشت ڈال سکتے ہیں۔

 ان کے بقول مذاکرات عموماً مفاد پر مبنی ہوتے ہیں، لیکن عمران خان کسی اصول پرست شخصیت کے حامل نہیں بلکہ ہر معاملے میں صرف اپنے فائدے کا سوچتے ہیں۔

خواجہ آصف کے اس بیان پر سیاسی حلقوں میں مختلف ردعمل سامنے آ رہے ہیں۔