افواجِ پاکستان کا قائداعظمؒ کے یومِ پیدائش پر خراجِ عقیدت، وژن سے غیر متزلزل وابستگی کا اعادہ

افواجِ پاکستان نے بانیٔ پاکستان قائداعظم محمد علی جناحؒ کے یومِ پیدائش کے موقع پر انہیں زبردست خراجِ عقیدت پیش کیا ہے۔

پاک فوج کے شعبۂ تعلقاتِ عامہ (آئی ایس پی آر) کے مطابق مسلح افواج نے اپنے پیغام میں کہا کہ قائداعظمؒ کی مثالی قیادت آج بھی قوم اور افواجِ پاکستان کے لیے مشعلِ راہ ہے۔

 آئی ایس پی آر کے مطابق چیف آف ڈیفنس فورسز فیلڈ مارشل سید عاصم منیر نے بھی بابائے قوم کو شاندار خراجِ تحسین پیش کیا۔

پیغام میں بتایا گیا کہ چیف آف ایئر اسٹاف اور چیف آف نیول اسٹاف کی جانب سے بھی قائداعظمؒ کو خراجِ عقیدت پیش کیا گیا اور افواجِ پاکستان نے قائداعظمؒ کے ویژن سے اپنی غیر متزلزل وابستگی کا اعادہ کیا۔

آئی ایس پی آر کا کہنا ہے کہ مسلح افواج نے قائداعظمؒ کے نظریات اور امنگوں کے مطابق بھرپور کردار ادا کرنے کے عزم کا اظہار کیا ہے۔

 افواجِ پاکستان نے ملک کی خودمختاری اور علاقائی سالمیت کے تحفظ، قومی استحکام، امن اور ترقی کے لیے اپنی جدوجہد جاری رکھنے کے عزم کا بھی اعادہ کیا۔