امریکی جریدے کا انکشاف: ٹی ٹی پی افغانستان میں موجود امریکی ہتھیاروں سے پاکستان میں دہشت گردی کر رہی ہے

امریکی جریدے دی جیو پالیٹکس نے انکشاف کیا ہے کہ کالعدم تنظیم ٹی ٹی پی (فتنہ الخوارج) افغانستان میں چھوڑے گئے امریکی ہتھیاروں کا استعمال کرتے ہوئے پاکستان میں دہشت گرد کارروائیاں انجام دے رہی ہے۔

رپورٹ کے مطابق ٹی ٹی پی پاکستانی سکیورٹی فورسز اور شہریوں کو مسلسل نشانہ بنا رہی ہے اور خیبرپختونخوا میں متعدد دہشت گرد اور پُرتشدد حملوں میں ملوث رہی ہے۔

 جریدے کا کہنا ہے کہ افغانستان میں موجود امریکی ہتھیاروں کی مجموعی مالیت 7 ارب ڈالر سے زائد ہے۔

رپورٹ میں بتایا گیا ہے کہ ایم-4 اور ایم-16 رائفلیں، نائٹ وژن آلات اور دیگر جدید امریکی اسلحہ دہشت گرد عناصر کی دسترس میں ہے۔

 امریکی جریدے کے مطابق یہ ہتھیار افغانستان کی بلیک مارکیٹ کے ذریعے دہشت گرد نیٹ ورکس کو فروخت کیے جا رہے ہیں۔

دوسری جانب سکیورٹی ذرائع کا کہنا ہے کہ پاکستان متعدد شواہد کے ذریعے یہ ثابت کر چکا ہے کہ افغانستان میں موجود دہشت گرد امریکی اسلحے کے ذریعے پاکستان میں حملے کر رہے ہیں۔