عاقب جاوید کا انکشاف: بھارت نے فاسٹ بولرز کی رہنمائی کے لیے پاکستان سے رابطہ کیا

سابق پاکستانی فاسٹ بولر اور پاکستان کرکٹ بورڈ (پی سی بی) کے ڈائریکٹر ہائی پرفارمنس عاقب جاوید نے انکشاف کیا ہے کہ بھارت نے اپنے فاسٹ بولرز کی رہنمائی کے لیے پاکستان سے رابطہ کیا ہے۔

عاقب جاوید کے مطابق یہ رابطہ پی سی بی کے اوورسیز پلیئرز پروگرام کے ذریعے کیا گیا۔

 انہوں نے یہ بات پی سی بی کے آفیشل پوڈکاسٹ میں گفتگو کے دوران بتائی، جہاں انہوں نے پاکستان کرکٹ کے ہائی پرفارمنس اسٹرکچر اور طویل المدتی منصوبہ بندی پر تفصیل سے روشنی ڈالی۔

عاقب جاوید نے نیشنل ہائی پرفارمنس سینٹر کو کھلاڑیوں کی ترقی کے لیے پی سی بی کا “انجن روم” قرار دیا اور کہا کہ نیشنل کرکٹ اکیڈمی (این سی اے) کے لیے بڑے منصوبے ہیں، جن میں مکمل فعال بائیومیکینکس لیبارٹری بھی شامل ہے۔

انہوں نے پی سی بی کے اوورسیز پاتھ وے پروگرام کی اہمیت پر بھی روشنی ڈالی، جس کے تحت دنیا بھر کے کرکٹرز کو تربیت اور کوچنگ کے مواقع فراہم کیے جا رہے ہیں۔

 عاقب جاوید نے بتایا کہ اب غیر ملکی کھلاڑی پاکستان آ کر تربیت حاصل کر سکتے ہیں، اور اب تک نیدرلینڈز اور انگلینڈ کے کھلاڑیوں کی میزبانی کی جا چکی ہے۔

انہوں نے کہا کہ یہ پروگرام مستقبل میں دنیا بھر تک پھیلایا جائے گا اور بھارت سے بھی حال ہی میں فون کالز موصول ہوئیں، جن میں درخواست کی گئی کہ ان کے فاسٹ بولرز کو رہنمائی فراہم کی جائے۔