چیف آف ڈیفنس فورسز فیلڈ مارشل عاصم منیر کی کرسمس تقریب میں شرکت، مسیحی برادری کو دلی مبارکباد

چیف آف ڈیفنس فورسز فیلڈ مارشل سید عاصم منیر نے راولپنڈی کے کرسٹ چرچ میں کرسمس کی تقریبات میں شرکت کی اور مسیحی برادری کے ساتھ خوشی کے موقع پر شریک ہوئے۔

پاک فوج کے شعبہ تعلقات عامہ (آئی ایس پی آر) کے مطابق، فیلڈ مارشل نے مسیحی برادری کو کرسمس کی دلی مبارکباد دی اور امن، ہم آہنگی اور خوشحالی کے لیے نیک تمناؤں کا اظہار کیا۔

انہوں نے قائدِ اعظم محمد علی جناحؒ کے مساوات، آزادی اور مذہبی رواداری کے وژن کو اجاگر کیا اور کہا کہ اقلیتوں کے حقوق کا تحفظ پاکستان کے نظریے کی بنیاد ہے۔

چرچ میں موجود افراد سے گفتگو کرتے ہوئے فیلڈ مارشل نے پاکستانی مسیحیوں کی مسلح افواج اور ملکی ترقی میں دیرینہ خدمات کو سراہا۔

انہوں نے بین المذاہب ہم آہنگی، باہمی احترام اور قومی اتحاد کی اہمیت پر زور دیا اور کہا کہ پاکستان کی طاقت اس کے تنوع، مساوی مواقع اور آئینی اقدار میں مضمر ہے۔

مسیحی رہنماؤں نے فیلڈ مارشل کے دورے پر اظہارِ تشکر کرتے ہوئے وطن کے دفاع اور قومی اتحاد میں پاک فوج کے کردار کو سراہا۔