انسدادِ دہشت گردی عدالت لاہور کا 9 مئی کے مقدمات کا تحریری فیصلہ، پی ٹی آئی رہنماؤں کو سزائیں سنا دی گئیں

انسداد دہشت گردی عدالت لاہور نے 9 مئی کے دو مقدمات کا تحریری فیصلہ جاری کرتے ہوئے اہم سیاسی شخصیات کو مختلف سزائیں سنا دیں۔

 عدالت نے سابق صوبائی وزیر میاں محمود الرشید کو مجموعی طور پر 33 سال قید اور 6 لاکھ روپے جرمانے کی سزا سنائی، جبکہ ڈاکٹر یاسمین راشد، اعجاز چوہدری اور عمر سرفراز چیمہ کو دس، دس سال قید کی سزا دی گئی۔

 میاں محمود الرشید کو مختلف دفعات کے تحت الگ الگ سزائیں سنائی گئیں۔

عدالت نے شواہد ناکافی ہونے پر 23 ملزمان کو بری کر دیا، جبکہ رہنماؤں سمیت سات ملزمان کے خلاف جرم ثابت ہونے پر قید کی سزا سنائی گئی۔

 فیصلے میں کہا گیا کہ ڈاکٹر یاسمین راشد، اعجاز چوہدری اور عمر سرفراز چیمہ سازش کی میٹنگز میں موجود تھے۔

عدالتی فیصلے کے مطابق پراسکیوشن نے مؤقف اختیار کیا کہ ڈاکٹر یاسمین راشد سمیت چار رہنماؤں نے ملک میں جلاؤ گھیراؤ کے لیے عوام میں انتشار پھیلایا۔

 عدالت میں مختلف واٹس ایپ پیغامات، 70 سوشل میڈیا اکاؤنٹس کا ڈیٹا اور فرانزک رپورٹس پیش کی گئیں۔

 فیصلے میں مزید کہا گیا کہ جے آئی ٹی نے ملزمان کو قصوروار قرار دیا اور اس رپورٹ کو کسی فورم پر چیلنج نہیں کیا گیا۔

 اگرچہ ملزمان نے اپنے حتمی بیانات میں خود کو بے گناہ قرار دیا، تاہم عدالت کے مطابق پراسکیوشن اپنا کیس ثابت کرنے میں کامیاب رہی۔