لاہور ہائیکورٹ کا ڈی آر سی کمیٹی کے ذریعے لیا گیا قبضہ فوری واپس کرنے کا حکم

لاہور ہائیکورٹ میں پراپرٹی اونر شپ ایکٹ کے تحت کی گئی کارروائیوں کے خلاف درخواست کی سماعت کے دوران چیف جسٹس عالیہ نیلم نے سخت ریمارکس دیتے ہوئے ڈی آر سی کمیٹی کے ذریعے حاصل کیا گیا قبضہ فوری طور پر واپس کرنے کا حکم دے دیا۔

 عدالت میں محمد علی کی درخواست پر سماعت ہوئی، جس میں قبضہ حاصل کرنے والا شہری بھی پیش ہوا۔

سماعت کے دوران چیف جسٹس نے قبضہ لینے والے فریق کے وکیل سے سوال کیا کہ وہ غلط فیصلے کا دفاع کس بنیاد پر کر رہے ہیں۔ 

وکیل نے مؤقف اختیار کیا کہ ڈپٹی کمشنرز کے ماتحت قائم کمیٹیوں نے اپنے اختیارات سے تجاوز کیا، جس پر چیف جسٹس نے ہدایت دی کہ پہلے قبضہ واپس کیا جائے، اس کے بعد مزید کارروائی ہوگی، ساتھ ہی کمیٹی ممبران کے خلاف کارروائی کا عندیہ بھی دیا۔

چیف جسٹس عالیہ نیلم نے ریمارکس دیے کہ وکیل خود تسلیم کر رہا ہے کہ ڈی سیز نے اختیارات سے تجاوز کیا۔

 انہوں نے کہا کہ اگر پٹواری بروقت اپنا کام کرتا تو یہ صورتحال پیدا نہ ہوتی، اور سسٹم کو بائی پاس کرنے سے ہی ایسے تنازعات جنم لیتے ہیں۔

سماعت کے دوران وکیل کے اس مؤقف پر کہ اگر نظام سے انصاف نہ ملے تو لوگ کہاں جائیں، چیف جسٹس نے کہا کہ عدالت میں اخباری سرخیوں کے لیے مکالمے نہ دیے جائیں، اور واضح کیا کہ وہ زیر التوا مقدمات کی سنگینی سے بخوبی آگاہ ہیں۔

عدالت کو بتایا گیا کہ دیپالپور میں 40 ایکڑ زمین پر مخالفین قابض ہیں، جبکہ مخالف فریق کے وکیل نے کہا کہ ڈی آر سی کمیٹی نے 27 دن میں قبضہ دلایا۔

 اس پر چیف جسٹس نے استفسار کیا کہ قبضے کا حکم کس نے دیا۔

چیف جسٹس نے قرار دیا کہ کمیٹی کی جانب سے قبضے کا حکم دینا مس کنڈکٹ کے زمرے میں آتا ہے۔

 عدالت نے واضح کیا کہ اس معاملے میں ڈی سی کو فیصلہ کرنے کا کوئی اختیار حاصل نہیں، اور اصل سوال ملکیت کا نہیں بلکہ یہ ہے کہ کیا ڈی سیز قانون کے تحت ایسے فیصلے کرنے کے مجاز ہیں یا نہیں۔