گزشتہ حکومت کھنڈرات چھوڑ گئی، پاکستان اب فخر کے ساتھ 2026 میں داخل ہو رہا ہے، خواجہ آصف

وفاقی وزیر دفاع خواجہ آصف نے کہا ہے کہ سابقہ حکومت ملک کو کھنڈرات کی صورت میں چھوڑ گئی تھی، تاہم اب پاکستان فخر اور اعتماد کے ساتھ 2026 میں داخل ہونے جا رہا ہے۔

 نجی ٹی وی سے گفتگو کرتے ہوئے انہوں نے کہا کہ جو تباہ شدہ بنیادیں پچھلی حکومت چھوڑ گئی تھی، ان پر اب تعمیر کا عمل شروع ہو چکا ہے۔

خواجہ آصف کا کہنا تھا کہ اہم قومی اور عالمی معاملات میں پاکستان کے مؤقف کو اب سنجیدگی سے لیا جا رہا ہے، جو موجودہ حکومت کی پالیسیوں اور فیصلوں کا نتیجہ ہے۔

 انہوں نے کہا کہ ان اقدامات کی بدولت پاکستان عزت اور وقار کے ساتھ نئے سال میں قدم رکھنے جا رہا ہے۔

انہوں نے مزید کہا کہ ملک کی داخلی اور خارجی سمت میں واضح بہتری آئی ہے اور وہ مسائل جنہیں ماضی میں نظر انداز کیا گیا، اب ان پر عملی پیش رفت ہو رہی ہے۔

 کمزور بنیادوں پر دوبارہ تعمیر کا آغاز ہو چکا ہے جس سے ریاستی امور میں استحکام پیدا ہو رہا ہے۔

دوسری جانب وزیرِ مملکت بلال اظہر کیانی نے کہا کہ عالمی اور سفارتی فورمز پر پاکستان کے بارے میں سامنے آنے والی مثبت رائے ملک کے لیے ایک بڑی کامیابی ہے۔

اسی طرح سینئر صوبائی وزیر شرجیل انعام میمن نے عالمی سطح پر پاکستان کی پذیرائی کو خوش آئند قرار دیتے ہوئے کہا کہ موجودہ پالیسیوں اور آرمی چیف کی قیادت کے باعث پاکستان کو دنیا بھر میں سراہا جا رہا ہے۔