چین خودکار گاڑیوں کی فروخت اور پیداوار کی رفتار سست کرنے جا رہا ہے، مہلک حادثے کے بعد اقدامات

چین جدید اور خودکار گاڑیوں کی وسیع پیمانے پر پیداوار اور فروخت کے منصوبے کی رفتار سست کرنے جا رہا ہے۔

 یہ اقدام ایک مہلک حادثے کے بعد اٹھایا گیا ہے جو خودکار ڈرائیونگ ٹیکنالوجی کی وجہ سے پیش آیا۔

رپورٹس کے مطابق چینی حکام نے گاڑی ساز کمپنیوں کی نو پروپوزلز میں سے صرف دو کو منظوری دی ہے، جو ملک میں وہیکل آٹومیشن کے عمل میں رفتار کم ہونے کی نشاندہی کرتا ہے۔

تجزیہ کاروں کے مطابق یہ اقدام ریگولیٹری اتھارٹی کے سخت موقف اور مارچ میں ہونے والے ایک حادثے سے جڑا ہوا ہے، جس میں شیاؤمی کی ایس یو 7 الیکٹرک کار کی ٹکر سے یونیورسٹی کے تین طالبِ علم ہلاک ہو گئے تھے۔

حادثے کے وقت کار 115.8 کلومیٹر فی گھنٹہ کی رفتار سے معاون ڈرائیونگ سسٹم کے ساتھ چل رہی تھی۔ 

سڑک پر جاری کام کی وجہ سے لین بند ہونے کی اطلاع ملنے پر سسٹم نے بلند آواز میں انتباہ جاری کیا۔

 ڈرائیور نے کنٹرول سنبھالا، لیکن ایک سیکنڈ کے اندر ہی گاڑی کنکریٹ کی رکاوٹ سے ٹکرا گئی، جس کے نتیجے میں حادثہ پیش آیا۔