سال کے اختتامی تعطیلات کے دوران دہشت گردانہ منصوبہ بندی کے شبہ میں ترکی نے 115 داعش کے مبینہ ارکان گرفتار کر لیے

ترکی کے حکام نے سال کے اختتامی تعطیلات کے دوران دہشت گرد حملوں کی منصوبہ بندی کے شبہ میں داعش کے 115 مبینہ ارکان کو گرفتار کر لیا ہے۔

استنبول کے پراسیکیوٹر جنرل کے مطابق یہ کارروائی انٹیلی جنس اطلاعات پر کی گئی، جن میں بتایا گیا تھا کہ داعش کرسمس اور نئے سال کی تقریبات کے دوران حملے کرنے کا ارادہ رکھتی ہے۔

 پراسیکیوٹر کے دفتر نے کہا کہ مجموعی طور پر 137 افراد کو حراست میں لینے کا حکم دیا گیا تھا، جن میں سے 115 کو گرفتار کیا گیا۔

حکام کے مطابق یہ افراد مختلف مقامات پر چھاپوں کے دوران پکڑے گئے اور مزید تحقیقات جاری ہیں۔ یہ کارروائی ملک میں دہشت گردی کے خطرات کو کم کرنے کے لیے کی گئی ہے۔

ترکی کی شام کے ساتھ تقریباً 900 کلومیٹر طویل سرحد ہے، جہاں شدت پسند گروہ اب بھی سرگرم ہیں۔

 شام میں دسمبر کے وسط میں داعش پر ہونے والے حالیہ حملے میں دو امریکی فوجی اور ایک شہری ہلاک ہوئے تھے۔ 

حکام سرحدی علاقوں میں دہشت گرد گروہوں کی سرگرمیوں پر کڑی نگرانی رکھ رہے ہیں تاکہ ممکنہ خطرات بروقت ناکام بنائے جا سکیں۔

دوسری جانب شامی حکام نے بتایا کہ امریکی قیادت میں قائم بین الاقوامی اتحاد کے ساتھ مشترکہ کارروائی میں دمشق کے علاقے سے داعش کے ایک سینیئر رہنما کو گرفتار کر لیا گیا ہے۔

 شامی سرکاری خبر رساں ادارے سانا کے مطابق جنرل احمد الدلاتی نے بتایا کہ طہٰ الزوبی، جو ابو عمر طبیہ کے نام سے بھی جانے جاتے ہیں، کو ان کے کئی ساتھیوں سمیت حراست میں لیا گیا ہے۔