ابھرتی ہوئی عالمی شہرت یافتہ گلوکارہ شائے گل کنسرٹ کے دوران زخمی

ابھرتی ہوئی عالمی شہرت یافتہ گلوکارہ شائے گل اسلام آباد کے پارک ویو سٹی میں جاری لائیو کنسرٹ کے دوران زخمی ہو گئیں۔

 تفصیلات کے مطابق کنسرٹ کے دوران ایک تیز رفتار اور بے قابو ڈرون ان کے ہاتھ سے ٹکرا گیا۔

 مذکورہ ڈرون کنسرٹ کی ریکارڈنگ کے لیے استعمال ہو رہا تھا لیکن پرفارمنس کے دوران گلوکارہ کے انتہائی قریب آ کر کنٹرول سے باہر ہو گیا۔

حادثے کے فوری بعد کنسرٹ میں تشویش کی فضا پیدا ہوئی، تاہم شائے گل نے بعد میں سوشل میڈیا پر مداحوں کو تسلی دیتے ہوئے کہا کہ وہ بالکل خیریت سے ہیں اور کسی سنگین چوٹ سے محفوظ رہیں۔

شائے گل نے اپنے پیغام میں کہا: "میں بالکل ٹھیک ہوں، آپ سب کی دعاؤں اور خیریت پوچھنے کا بے حد شکریہ۔

" گلوکارہ نے حادثے کے بعد ایک ویڈیو بھی شیئر کی جس میں ان کی کلائی اور ہاتھوں پر کٹ کے نشانات اور خون کے دھبے دیکھے جا سکتے ہیں۔

کنسرٹ کے منتظمین کے مطابق حادثہ ایک ناتجربہ کار ڈرون آپریٹر کی وجہ سے پیش آیا، جس کے باعث ڈرون کنٹرول سے باہر ہو گیا، اور سوشل میڈیا صارفین نے اس بات پر تشویش کا اظہار کیا کہ بڑے کنسرٹ میں ایسے غیر پیشہ ور آپریٹرز سنگین حادثے کا سبب بن سکتے ہیں۔