حکومت پراپرٹی فراڈ کے خلاف اعلیٰ سطحی کمیٹی قائم کرے گی، وزیراعظم کے احکامات

اسلام آباد: ملک میں پراپرٹی فائلوں، پلاٹس، ولاز اور اپارٹمنٹس کے فراڈ کے خلاف حکومت سخت اقدامات کرنے جا رہی ہے۔

 اس سلسلے میں وزیراعظم نے اعلیٰ سطحی کمیٹی تشکیل دینے کے احکامات جاری کر دیے ہیں۔

نجی ٹی وی کے مطابق، کمیٹی کا مقصد رئیل اسٹیٹ سیکٹر میں شفافیت کو فروغ دینا اور فراڈ، ٹیکس چوری اور سرمایہ کاروں کے تحفظ سے متعلق بڑھتے خدشات کا جائزہ لینا ہے۔

 کمیٹی کی سربراہی وزیر قانون و انصاف کریں گے جبکہ چیئرمین ایف بی آر، تمام صوبوں کے سینئر ممبرز بورڈ آف ریونیو، نیب کا گریڈ 21 یا اس سے اوپر کا نمائندہ، چیف کمشنر اسلام آباد کیپٹل ٹیریٹری اور ایسوسی ایشن آف بلڈرز اینڈ ڈیولپرز (آباد) کا نمائندہ شامل ہوں گے۔

کمیٹی کو فائل سسٹم کے عملی طریقہ کار اور قانونی حیثیت، وفاقی اور صوبائی سطح پر رئیل اسٹیٹ کاروبار کے اثرات، ڈویلپرز کی جانب سے مبینہ فراڈ، جعلی یا دہری فائلیں، اور ایک ہی جائیداد کی بار بار فروخت جیسے معاملات کا جائزہ لینے کی ذمہ داری دی گئی ہے۔

ٹی او آرز کے تحت کمیٹی متعلقہ قوانین میں ترامیم کی سفارش بھی کرے گی تاکہ پراپرٹی فائلوں کی خرید و فروخت شفاف اور قانونی فریم ورک کے تحت ہو، ٹیکس کی درست وصولی یقینی بنائی جا سکے اور سرمایہ کاروں کو تحفظ فراہم کیا جا سکے۔

 کمیٹی کو ایک ماہ کے اندر اپنی رپورٹ حکومت کو پیش کرنے کی ہدایت دی گئی ہے۔

یہ کمیٹی اسلام آباد اور راولپنڈی میں ایک بڑے ہاؤسنگ اسکینڈل کے انکشاف کے بعد قائم کی گئی، جس میں بتایا گیا کہ نجی ہاؤسنگ اسکیموں نے مبینہ طور پر بغیر زمین کے 90 ہزار سے زائد پلاٹس فروخت کیے اور سیکڑوں ارب روپے وصول کیے۔