لاہور ہائیکورٹ میں 2026 کی پہلی درخواست: سرکاری ہسپتالوں میں ادویات کی فوری فراہمی کا مطالبہ

لاہور ہائیکورٹ میں 2026 کی پہلی درخواست دائر کی گئی ہے، جس میں استدعا کی گئی کہ پنجاب کے تمام سرکاری ہسپتالوں میں ادویات کی مفت اور بلا تعطل فراہمی یقینی بنائی جائے۔

درخواست گزار کا مؤقف ہے کہ سرکاری ہسپتالوں میں جان بچانے والی اور دیگر ضروری ادویات کی کمی کی شکایات عام ہو گئی ہیں، جس کی وجہ سے مریض پرائیوٹ فارمیسیز سے مہنگی ادویات خریدنے پر مجبور ہیں۔

درخواست میں کہا گیا کہ سرکاری ہسپتالوں میں ادویات کی قلت آئین کے آرٹیکل 9 (حقِ زندگی) اور 25 (برابری) کی خلاف ورزی ہے، اور بھاری سرکاری بجٹ ہونے کے باوجود ضروری ادویات دستیاب نہیں۔

درخواست میں عدالت سے استدعا کی گئی کہ پنجاب بھر کے سرکاری ہسپتالوں میں فوری طور پر تمام ضروری ادویات فراہم کرنے کا حکم دیا جائے اور لاہور ہائیکورٹ ادویات کے سٹاک کی مانیٹرنگ اور فراہمی کے لیے ایک ہائی پاور کمیٹی تشکیل دے۔