وی اون گروپ کی 20 ملین ڈالر سرمایہ کاری، پاکستان کے مالیاتی شعبے میں 2026 کا پُراعتماد آغاز

ڈیجیٹل اصلاحاتی فریم ورک کے تحت سال 2026 میں پاکستان کے مالیاتی شعبے میں خوش آئند اور پُراعتماد آغاز ہوا ہے۔

خصوصی سرمایہ کاری سہولت کونسل (ایس آئی ایف سی) کی دور اندیش معاشی حکمتِ عملی کی بدولت عالمی سرمایہ کاروں کا پاکستان کے ڈیجیٹل بینکاری نظام پر اعتماد مزید مستحکم ہوا ہے۔

سال 2026 کے آغاز پر مالیاتی شعبے میں اہم غیر ملکی سرمایہ کاری سامنے آئی، جس میں عالمی ڈیجیٹل آپریٹر وی اون گروپ نے موبی لنک بینک میں 20 ملین ڈالر کی نئی سرمایہ کاری کا اعلان کیا۔

یہ سرمایہ کاری جنوری 2025 میں کی گئی 15 ملین ڈالر سرمایہ کاری کا تسلسل ہے، جو موبی لنک بینک کی مسلسل ترقی اور پاکستان کے ڈیجیٹل مالیاتی ایکو سسٹم پر عالمی اعتماد کی عکاس ہے۔

وی اون گروپ کے مطابق یہ سرمایہ کاری عالمی سطح پر اعلیٰ اثر رکھنے والے ڈیجیٹل مالیاتی ایکو سسٹمز کو مضبوط بنانے کی حکمتِ عملی کا حصہ ہے۔

 موبی لنک بینک اور جازکیش پر مشتمل مربوط نظام پاکستان کے فِن ٹیک اور مالی شمولیت کے ایجنڈے کو نئی رفتار دے رہا ہے۔

وی اون گروپ کی ایگزیکٹو کمیٹی کے رکن اور موبی لنک بینک کے چیئرمین عامر ابراہیم نے کہا کہ وی اون کی مسلسل سرمایہ کاری پاکستان کے ڈیجیٹل مالیاتی نظام میں جاری ساختی اصلاحات پر طویل المدتی اعتماد کی واضح علامت ہے۔

ایس آئی ایف سی کی بصیرت افروز رہنمائی میں پاکستان 2026 میں سرمایہ کاری، عالمی اعتماد اور پائیدار ترقی کے سنہرے مرحلے میں داخل ہو چکا ہے۔