بھارت میں اقلیتوں کے خلاف منظم اقدامات، پرکاش راج کا بیان

 بھارتی اداکار اور ہدایت کار پرکاش راج نے کہا ہے کہ بھارت میں مسلمانوں اور دیگر اقلیتوں کے خلاف منظم ایجنڈے کے تحت کارروائیاں کی جا رہی ہیں، جس سے معاشرتی تقسیم اور خوف کا ماحول پیدا ہو رہا ہے۔

پرکاش راج نے وزیر اعظم نریندر مودی، بی جے پی اور آر ایس ایس پر تنقید کرتے ہوئے کہا کہ ریاستی ادارے ہندوتوا ایجنڈے کے تابع ہو چکے ہیں، جس کے باعث انصاف نہیں بلکہ عام شہریوں کو ریاستی اداروں سے خوف محسوس ہو رہا ہے۔

انہوں نے کہا کہ پولیس کے غیر قانونی رویے اور جابرانہ اقدامات عوام سے دوری پیدا کر چکے ہیں، اور آر ایس ایس بھارت کے لیے ایک بڑا خطرہ ہے۔

 پرکاش راج نے رام مندر میں پرچم کشائی کے واقعے کو بی جے پی اور آر ایس ایس کے گٹھ جوڑ کی واضح مثال قرار دیا۔

سیاسی تجزیہ کاروں کے مطابق بی جے پی اور آر ایس ایس آئینی تبدیلیوں اور جمہوری اقدار کو کمزور کرنے کے الزامات کی زد میں ہیں، اور مودی حکومت کے تحت اقلیتوں کے حقوق پر سوالات اٹھ رہے ہیں۔