پولیس افسران کی مالی مشکلات کے حل کیلئے اقدامات جاری: محسن نقوی

اسلام آباد: وفاقی وزیر داخلہ محسن نقوی نے کہا ہے کہ پولیس افسران کی مالی مشکلات کو دور کرنے کے لیے خصوصی اقدامات کیے جا رہے ہیں اور ہر افسر کی تنخواہ بہتر بنانے کی کوشش کی جا رہی ہے۔

محسن نقوی نے اسلام آباد میں نیشنل پولیس اکیڈمی کا دورہ کیا اور وہاں کی تزئین و آرائش کا جائزہ لیا۔ انہوں نے کمانڈنٹ نیشنل پولیس اکیڈمی محمد ادریس کو ضروری ہدایات دیں اور کانفرنس ہال، ڈائننگ ہال اور دیگر رومز کا معائنہ کیا۔

وزیر داخلہ نے زیرِ تربیت اے ایس پیز سے خطاب میں کہا کہ پاسنگ آؤٹ پر انہیں پلاٹ دیے جائیں گے، موجودہ پولیس بیچ کو بین الاقوامی معیار کے مطابق تیار کیا جائے گا، اور ایک ماہ کی تربیت کے لیے بیجنگ بھیجا جائے گا۔

محسن نقوی نے مزید کہا کہ تربیتی ماڈیولز کو جدید تقاضوں کے مطابق بہتر بنایا جائے گا، افسران کی پیشہ ورانہ قابلیت اور عملی مہارت بڑھانے کے اقدامات کیے جائیں گے، جبکہ نیشنل پولیس فاؤنڈیشن کے تعاون سے افسران کے لیے جدید سہولیات فراہم کی جائیں گی اور پروموشن کے مسائل حل کیے جائیں گے۔