مقبوضہ کشمیر میں علما اور مساجد کمیٹیوں کی پروفائلنگ منظم ہراسانی ہے: دفتر خارجہ

 پاکستان نے مقبوضہ جموں و کشمیر میں بھارت کی جانب سے علما، مساجد اور مسجد مینجمنٹ کمیٹیوں کے ارکان کی مبینہ پروفائلنگ کی شدید مذمت کی ہے۔

وزارت خارجہ کے جاری کردہ بیان میں کہا گیا ہے کہ یہ بھارتی اقدام مذہبی امور میں کھلی مداخلت ہے اور مذہبی آزادی و عقیدے کے بنیادی حق کی سنگین خلاف ورزی کے مترادف ہے۔

 ان اقدامات کا مقصد مقبوضہ علاقے کی مسلم آبادی کو خوفزدہ کرنا اور انہیں تنہائی میں دھکیلنا ہے۔

ترجمان دفتر خارجہ کے مطابق مذہبی شخصیات سے زبردستی ذاتی کوائف، تصاویر اور مسلکی وابستگیوں کی تفصیلات اکٹھی کرنا منظم ہراسانی کے زمرے میں آتا ہے، جس کا مقصد نمازیوں میں خوف پیدا کرنا اور انہیں آزادانہ طور پر مذہبی فرائض کی ادائیگی سے روکنا ہے۔

بیان میں کہا گیا کہ یہ اقدامات قابض بھارتی حکومت کی ہندوتوا نظریے اور اسلاموفوبیا پر مبنی پالیسیوں کا تسلسل ہیں، جبکہ مساجد اور مسلم علما کو نشانہ بنانا ان پالیسیوں کے امتیازی اور فرقہ وارانہ کردار کا واضح ثبوت ہے۔

دفتر خارجہ نے واضح کیا کہ جموں و کشمیر کے عوام کو بغیر کسی خوف، جبر یا امتیاز کے اپنے مذہب پر عمل کرنے کا ناقابلِ تنسیخ حق حاصل ہے، اور پاکستان کشمیری عوام کے ساتھ اظہارِ یکجہتی جاری رکھتے ہوئے مذہبی جبر اور عدم برداشت کی ہر صورت کے خلاف آواز بلند کرتا رہے گا۔