امریکی جریدہ: بھارت کا پانی کو سٹریٹجک ہتھیار بنانا بڑا انسانی خطرہ بن سکتا ہے

واشنگٹن: امریکی جریدے “دی نیشنل انٹرسٹ” نے سندھ طاس معاہدے کے خلاف بھارت کے اقدامات پر پاکستان کے موقف کی بھرپور حمایت کرتے ہوئے لکھا ہے کہ بھارت کے اقدامات سے جنوبی ایشیا میں بڑا انسانی خطرہ پیدا ہو سکتا ہے۔

رپورٹ کے مطابق، بھارت کی جانب سے سندھ طاس معاہدے کی معطلی نے پانی کی سیاست میں نیا رخ دے دیا ہے اور علاقائی کشیدگی میں اضافہ کر سکتا ہے۔

جریدے نے بھارت کے دُلہستی اسٹیج II منصوبے کو معاہدے کے خلاف قدم قرار دیا اور کہا کہ بھارت پانی کو سٹریٹجک ہتھیار بنا رہا ہے، جس سے جنوبی ایشیا میں شدید انسانی بحران پیدا ہونے کا خطرہ ہے۔

امریکی جریدے کے مطابق، بھارت کی جانب سے آبی ڈیٹا فراہم نہ کرنا بین الاقوامی قوانین کی خلاف ورزی ہے، اور عالمی ثالثی عدالت نے واضح کیا ہے کہ بھارت سندھ طاس معاہدہ یکطرفہ طور پر معطل نہیں کر سکتا۔

سندھ طاس معاہدہ جنوبی ایشیا میں فوڈ سکیورٹی کی بنیادی ضمانت ہے، اور بھارت پر مغربی دریاؤں کا پانی پاکستان کو فراہم کرنا قانونی طور پر لازم ہے۔

 پانی کو ہتھیار بنانے کی بھارتی کوشش عالمی عدالتوں اور بین الاقوامی قانون کے تحت ناقابل قبول ہے۔