انسپائرڈ گمبٹ مشق سے پاکستان اور امریکا کے دفاعی تعلقات میں نئی مضبوطی

پاکستان اور امریکا کی افواج کے درمیان مشترکہ فوجی مشق انسپائرڈ گمبٹ کے انعقاد سے دونوں ممالک کے دفاعی تعاون کو مزید استحکام ملا ہے۔ 

امریکی حکام نے اس مشق کو پاک امریکا دفاعی شراکت داری میں ایک اہم پیش رفت قرار دیا ہے۔

امریکی سینٹرل کمانڈ (سینٹ کام) کے سرکاری ایکس اکاؤنٹ پر جاری بیان کے مطابق رواں ہفتے نیشنل کاؤنٹر ٹیررازم سینٹر پبی میں امریکی اور پاکستانی افواج نے انسدادِ دہشت گردی سے متعلق مشترکہ تربیت کامیابی سے مکمل کی۔

بیان میں کہا گیا کہ مشق کے دوران انفنٹری کی پیشہ ورانہ مہارتوں، جدید جنگی حکمتِ عملیوں اور دہشت گردی کے خلاف مشترکہ آپریشنز پر خصوصی توجہ دی گئی، جس سے دونوں افواج کے درمیان باہمی اعتماد، ہم آہنگی اور عملی تعاون میں اضافہ ہوا۔

واضح رہے کہ انسپائرڈ گمبٹ 2026 کا انعقاد 8 سے 16 جنوری تک کیا گیا، دو ہفتوں پر محیط اس مشق کا مرکزی مقصد انسدادِ دہشت گردی کی صلاحیتوں کو مزید مؤثر بنانا تھا۔

یہ مشق 1995 سے جاری پاک امریکا دوطرفہ تربیتی سلسلے کی 13ویں کڑی ہے، جو دونوں ممالک کے دیرینہ دفاعی تعلقات اور مسلسل فوجی تعاون کی عکاس ہے۔