وزیراعظم نے پٹرولیم مصنوعات کی قیمتوں اور رسد کی نگرانی کیلئے کمیٹی قائم کر دی

وزیراعظم شہباز شریف نے عالمی منڈی میں پٹرولیم مصنوعات کی بڑھتی قیمتوں کے پیش نظر ایندھن کی قیمتوں اور فراہمی کی نگرانی کیلئے 19 رکنی کمیٹی تشکیل دے دی ہے۔

وزیراعظم آفس کی جانب سے جاری نوٹیفکیشن کے مطابق کمیٹی روزانہ کی بنیاد پر پٹرولیم مصنوعات کی قیمتوں، دستیابی اور سٹاک پوزیشن کا جائزہ لے کر اپنی رپورٹ براہِ راست وزیراعظم کو پیش کرے گی۔ وفاقی وزیر خزانہ محمد اورنگزیب کمیٹی کے کنوینئر ہوں گے۔

کمیٹی میں پٹرولیم و توانائی کے وفاقی وزرا، گورنر اسٹیٹ بینک، چیئرمین ایف بی آر، اوگرا سمیت توانائی شعبے کے اہم اداروں کے سربراہان شامل ہیں۔

 پاکستان اسٹیٹ آئل، پارکو، سوئی سدرن گیس کمپنی اور سوئی ناردرن گیس پائپ لائنز کے اعلیٰ حکام بھی اس کا حصہ ہوں گے۔

ذخیرہ اندوزی اور مصنوعی قلت کی روک تھام کیلئے انٹیلی جنس اداروں کے نمائندوں کو بھی شامل کیا گیا ہے۔

 کمیٹی پٹرولیم قیمتوں میں ردوبدل کے معاشی اثرات کا جائزہ لے کر قلیل اور درمیانی مدت کی تجاویز پیش کرے گی تاکہ ملک میں ایندھن کی مسلسل فراہمی اور قیمتوں میں استحکام یقینی بنایا جا سکے۔