خطے میں جنگی کشیدگی میں اضافہ، بحری اثاثے تباہ اور زیرِ زمین تنصیب کو نشانہ بنانے کا دعویٰ

واشنگٹن: امریکی سینٹرل کمانڈ کے اعلیٰ عہدیدار ایمل بیرڈ کوپر نے دعویٰ کیا ہے کہ جاری فوجی کارروائیوں کے دوران تقریباً 2 ہزار اہداف کو نشانہ بنایا گیا جبکہ ایک آبدوز سمیت 17 بحری جہاز تباہ کر دیے گئے۔

حکام کے مطابق آپریشن میں تقریباً 50 ہزار اہلکار، 200 سے زائد جنگی طیارے اور ایئرکرافٹ کیریئرز حصہ لے رہے ہیں، جبکہ سینکڑوں بیلسٹک میزائل اور ڈرونز بھی تباہ کیے گئے۔

اس سے قبل سابق امریکی صدر ڈونلڈ ٹرمپ نے کہا تھا کہ فوجی کارروائیاں اپنے اہداف کے حصول تک جاری رہیں گی۔

دوسری جانب امریکی وزیر خارجہ مارکو روبیو نے کہا کہ جوہری ہتھیاروں کی تیاری روکنا اہم مقصد ہے اور فوجیوں و شہریوں کی سلامتی اولین ترجیح ہے۔

 ان کے مطابق اب تک تقریباً 9 ہزار شہریوں کو خطے سے منتقل کیا جا چکا ہے۔

ادھر اسرائیلی دفاعی افواج نے زیرِ زمین جوہری نوعیت کی تنصیب پر حملے کا دعویٰ کرتے ہوئے کہا کہ وہاں حساس تحقیق جاری تھی، تاہم متعلقہ ملک کی جانب سے فوری ردعمل سامنے نہیں آیا۔

مزید برآں سعودی وزارت دفاع نے دعویٰ کیا ہے کہ ریاض کے جنوب میں دو کروز میزائل اور نو ڈرون حملوں کو کامیابی سے ناکام بنا دیا گیا۔