تیسرے ون ڈے میں متنازع ریویو پر پی سی بی نے شکایت درج کرا دی

پاکستان کرکٹ بورڈ (پی سی بی) نے بنگلا دیش کے خلاف تیسرے ون ڈے میں متنازع ڈی آر ایس فیصلے پر باضابطہ شکایت درج کروا دی ہے۔

بورڈ نے میچ ریفری نیامور سے رابطہ کر کے آن فیلڈ امپائر دھرماسینا کمار کے فیصلے پر اعتراض کیا۔ 

پاکستان ٹیم مینجمنٹ کے مطابق بنگلا دیش نے ایل بی ڈبلیو ریویو تب لیا جب گیند کا ری پلے اسٹیڈیم کی بڑی اسکرین پر پہلے ہی دکھایا جا چکا تھا، جس سے ممکنہ طور پر غیر منصفانہ فائدہ حاصل ہوا۔

یہ واقعہ شیر بنگلا اسٹیڈیم میں آخری لمحات میں پیش آیا، جب پاکستان کو آخری دو گیندوں پر 12 رنز درکار تھے۔ 

بنگلا دیش کے بولر رشاد حسین کی گیند کو ابتدائی طور پر وائیڈ قرار دیا گیا، تاہم کھلاڑیوں نے مختصر مشاورت کے بعد ریویو لیا، جس سے ریویو کے وقت اور قواعد پر سوالات پیدا ہوئے۔

پی سی بی نے خدشہ ظاہر کیا کہ ریویو 15 سیکنڈ کی حد سے زائد لیا گیا، حالانکہ براڈکاسٹ پر کوئی ٹائمر نظر نہیں آیا۔ 

ہاک آئی کے تحت بعد میں پتہ چلا کہ گیند شاہین آفریدی کے بیٹ کو چھو کر گزری، جس سے وائیڈ کا فیصلہ واپس لے لیا گیا اور پاکستان کو آخری گیند پر 12 رنز درکار رہ گئے۔

آخری گیند پر شاہین آفریدی اسٹمپ ہو گئے، اور بنگلا دیش نے میچ 11 رنز سے جیت کر سیریز 2-1 اپنے نام کر لی۔

پی سی بی نے ابھی واضح نہیں کیا کہ میچ ریفری سے کیا کارروائی چاہتے ہیں، تاہم ذرائع کے مطابق بورڈ کم از کم وضاحت یا غلطی کے اعتراف کا مطالبہ کر سکتا ہے۔

اس سے قبل دوسرے ون ڈے میں سلمان علی آغا کے متنازع رن آؤٹ پر بنگلا دیشی آل راؤنڈر مہدی حسن سے تلخ جملوں کا تبادلہ بھی ہوا تھا۔