ایران کی پاسداران انقلاب نے اسرائیل کا F-16 طیارہ مار گرایا

ایران کی پاسداران انقلاب نے دعویٰ کیا ہے کہ اس نے مرکزی ایران کی فضائی حدود میں اسرائیل کے ایف-16 لڑاکا طیارے کو میزائل سے نشانہ بنایا۔

ایرانی میڈیا کے مطابق پاسداران انقلاب کے بیان میں کہا گیا کہ یہ کارروائی صبح 3 بج کر 45 منٹ پر کی گئی اور جدید فضائی دفاعی نظام استعمال کیا گیا۔

 بیان میں مزید کہا گیا کہ جنگ کے دوران دو سو سے زائد دشمن فضائی اہداف کو نشانہ بنایا جا چکا ہے، جن میں ڈرون، کروز میزائل اور لڑاکا طیارے شامل ہیں۔

دوسری جانب اسرائیلی فوج نے تصدیق کی کہ اس کا ایک لڑاکا طیارہ ایرانی فضائی حدود میں کارروائی کے دوران فضائی دفاعی نظام کی زد میں آیا، لیکن پائلٹ نے بروقت خطرے کو محسوس کیا، جس کے باعث طیارے کو کوئی نقصان نہیں پہنچا اور اس نے اپنا طے شدہ مشن کامیابی سے مکمل کیا۔

خیال رہے کہ امریکا نے ایران کے جوہری مرکز نطنز کو نشانہ بنایا، تاہم ایرانی حکام نے کہا کہ سب کچھ کنٹرول میں ہے اور تابکاری کا اخراج نہیں ہوا۔

 ایران نے کئی ہزار کلومیٹر دور امریکا اور برطانیہ کے مشترکہ فوجی اڈے کو بھی بیلسٹک میزائل سے نشانہ بنایا، جو ڈیاگو گارشیا جزیرہ میں واقع ہے، پاسبندر کی بندرگاہ سے 3,800 کلومیٹر دور۔ ایرانی بیلسٹک اور کروز میزائلوں کی رینج 2,000 سے 2,500 کلومیٹر کے درمیان ہے۔