برطانیہ کو ایران جنگ میں شامل نہیں ہونے دیں گے، وزیراعظم کا اعلان، معاشی اقدامات کا بھی اعلان

برطانوی وزیراعظم نے واضح کیا ہے کہ برطانیہ کو ایران سے متعلق جاری جنگ میں شامل نہیں ہونے دیا جائے گا، ساتھ ہی انہوں نے معیشت کو مستحکم کرنے اور عوام کو ریلیف دینے کے لیے مختلف اقدامات کا اعلان بھی کیا۔

لندن میں پریس کانفرنس سے خطاب کرتے ہوئے وزیراعظم کیئر اسٹریمر نے کہا کہ برطانیہ اپنے قومی مفاد کے تحت فیصلے کرے گا اور موجودہ چیلنجز سے دانشمندی اور منصوبہ بندی کے ساتھ نمٹے گا۔ انہوں نے دو ٹوک الفاظ میں کہا کہ ملک کو ایران جنگ میں نہیں گھسیٹا جائے گا۔

انہوں نے کہا کہ موجودہ عالمی غیر یقینی صورتحال کے پیش نظر یورپی اتحادیوں کے ساتھ مضبوط تعلقات ناگزیر ہیں تاکہ طویل مدتی استحکام کو یقینی بنایا جا سکے۔

توانائی کے مسائل پر بات کرتے ہوئے وزیراعظم نے قابلِ تجدید توانائی پر زور دیا اور کہا کہ اس حکمت عملی کے تحت عوام کو ریلیف فراہم کیا جا رہا ہے۔

 انہوں نے اعلان کیا کہ توانائی کی قیمتیں جولائی تک مقرر کر دی گئی ہیں جس سے صارفین کے بلوں میں کمی آئے گی اور غیر یقینی صورتحال کم ہوگی۔

انہوں نے نیشنل لیونگ ویج پر کام کرنے والے افراد کی تنخواہوں میں اضافے کا اعلان بھی کیا، جس سے لاکھوں افراد کو فائدہ ہوگا اور تقریباً 4 لاکھ 50 ہزار بچوں کو غربت سے نکالنے میں مدد ملے گی۔

وزیراعظم نے مزدوروں کے حقوق کے تحفظ کے لیے نئی قانون سازی آئندہ ہفتے نافذ کرنے کا اعلان کیا، جسے ایک نسل میں بڑی پیش رفت قرار دیا جا رہا ہے۔

انہوں نے کہا کہ حکومت پہلے ہی صاف توانائی کے فروغ کے لیے سرمایہ کاری کر چکی ہے اور مستقبل میں بھی یہ پالیسی جاری رکھی جائے گی تاکہ ملک کو توانائی کے جھٹکوں سے محفوظ رکھا جا سکے اور معیشت کو مضبوط بنایا جا سکے۔

وزیراعظم نے مزید کہا کہ آئندہ ہفتوں میں یورپی اتحادیوں کے ساتھ ایک نئے سربراہی اجلاس کا انعقاد کیا جائے گا جہاں مستقبل کے تعاون کے حوالے سے نئے اقدامات بھی سامنے آئیں گے۔

انہوں نے یہ بھی بتایا کہ فیول ڈیوٹی سے متعلق ستمبر میں نافذ ہونے والے فیصلوں کا دوبارہ جائزہ لیا جا رہا ہے تاکہ عوام کے مفاد کو یقینی بنایا جا سکے۔