اسرائیل: ایران کیلئے جاسوسی کا الزام، خاتون زیرِ حراست

اسرائیل کے شمالی شہر میں ایک خاتون پر ایران کے لیے جاسوسی اور حساس مقامات کی ویڈیو بنانے کا الزام عائد کر دیا گیا۔  اسرائیلی حکام کے مطابق شمالی شہر ناصرت میں ایک خاتون پر ایران کے لیے جاسوسی کا الزام عائد کر کے انہیں حراست میں لے لیا گیا۔ 

اسرائیلی پولیس اور سیکیورٹی ایجنسی شن بیت نے مشترکہ بیان میں کہا ہے کہ شوموا ابو عابد نامی خاتون کو مارچ میں حراست میں لیا گیا تھا اور وہ گزشتہ سال اکتوبر سے ایک غیر ملکی ایجنٹ کو کرپٹو کرنسی کے عوض معلومات فراہم کر رہی تھیں۔

 میڈیا رپورٹس کے مطابق ملزمہ پر متعدد مشنز انجام دینے کا الزام ہے، جن میں حساس سیکیورٹی مقامات، اسرائیلی فوجی اڈوں اور حیفہ آئل ریفائنری کی تصاویر لینا شامل ہے۔

 میڈیا رپورٹس کے مطابق خاتون نے سابق اسرائیلی سیکیورٹی اہلکار سے متعلق معلومات بھی منتقل کیں۔ اسرائیلی حکام کے مطابق گزشتہ 2 برسوں کے دوران ایران کے لیے جاسوسی کے شبے میں 50 سے زائد افراد کو گرفتار کیا جا چکا ہے، جو تقریباً 38 منظرِ عام پر آنے والے مقدمات کا حصہ ہیں۔