سلمان خان اور شاہ رخ خان کے سیکیورٹی گارڈز کی کروڑوں کی تنخواہوں کی خبروں کی تردید

بالی ووڈ کے سپر اسٹارز سلمان خان اور شاہ رخ خان کے سیکیورٹی گارڈز کی مبینہ کروڑوں روپے ماہانہ تنخواہوں سے متعلق خبروں پر حقیقت سامنے آ گئی ہے۔

معروف سیکیورٹی کنسلٹنٹ یوسف ابراہیم نے ایک انٹرویو میں ان دعوؤں کو غلط قرار دیتے ہوئے کہا ہے کہ سلیبریٹیز اور ان کے گارڈز کی اصل آمدن کے درست اعداد و شمار عام طور پر عوام کے سامنے نہیں آتے، اس لیے اس حوالے سے پھیلنے والی کئی خبریں محض قیاس آرائی ہوتی ہیں۔

انہوں نے شاہ رخ خان کے باڈی گارڈ روی سنگھ کے بارے میں گردش کرنے والی افواہوں پر بات کرتے ہوئے کہا کہ ان کی کروڑوں روپے ماہانہ تنخواہ کی خبریں حقیقت پر مبنی نہیں ہیں۔

یوسف ابراہیم کے مطابق سلمان خان کے دیرینہ باڈی گارڈ شیرا نہ صرف سیکیورٹی خدمات انجام دیتے ہیں بلکہ ان کا اپنا کاروبار بھی ہے، اس لیے ان کی آمدن کو صرف تنخواہ سے منسوب کرنا درست نہیں۔

انہوں نے واضح کیا کہ عام طور پر سیکیورٹی گارڈز کی ماہانہ تنخواہ تقریباً 10 سے 12 لاکھ روپے تک ہو سکتی ہے، جبکہ کروڑوں روپے ماہانہ کمانے کی باتیں درست نہیں ہیں۔