امریکی فوج نے ایران کیخلاف ’مختصر اور طاقت ور‘ حملوں کا منصوبہ تیار کر لیا

ایک امریکی نیوز ویب سائٹ نے رپورٹ دی ہے کہ امریکی مرکزی کمان (سینٹ کام) کے سربراہ ایڈمرل بریڈ کوپر ایران کے خلاف نئے ممکنہ حملوں کے منصوبوں پر صدر ٹرمپ کو بریفنگ دیں گے۔ 

ذرائع کے حوالے سے ایگزیوس نے بتایا ہے کہ امریکی سینٹ کام نے ایران کے خلاف ’مختصر اور طاقت ور‘ حملوں کا ایک منصوبہ تیار کیا ہے جس میں ایران کے انفراسٹرکچر کو بھی نشانہ بنایا جا سکتا ہے۔ 

ایگزیوس کی رپورٹ کے مطابق واشنگٹن کو امید ہے کہ اس سے ایران جوہری پروگرام سے متعلق مذاکرات کی میز پر زیادہ لچک دکھانے پر آمادہ ہو گا۔ 

ایک منصوبہ جو ٹرمپ کو پیش کیا جا سکتا ہے وہ یہ ہے کہ آبنائے ہرمز کے ایک حصے پر کنٹرول حاصل کر کے اسے تجارتی جہاز رانی کے لیے کھول دیا جائے، اس کارروائی میں زمینی افواج شامل ہو سکتی ہیں۔ 

ایگزیوس کے مطابق امریکی صدر کو بریفنگ کے دوران ایک آپشن یہ بھی دیا جا سکتا ہے کہ خصوصی افواج بھیج کر ایران کے افزودہ یورینیم کے ذخائر حاصل کر لیے جائیں۔