پنجاب میں دفعہ 144 میں مزید 7 روز کی توسیع، احتجاجی سرگرمیوں پر پابندی برقرار

محکمہ داخلہ پنجاب نے صوبے بھر میں نافذ دفعہ 144 کی مدت میں مزید سات روز کی توسیع کر دی ہے، جس کا باضابطہ نوٹیفکیشن جاری کر دیا گیا ہے۔ اس فیصلے کے بعد پابندی 22 نومبر تک برقرار رہے گی۔

نوٹیفکیشن کے مطابق پنجاب میں ہر قسم کے احتجاج، جلسے، جلوس، ریلیاں، دھرنے اور عوامی اجتماعات پر مکمل پابندی برقرار رہے گی۔ دفعہ 144 کے تحت چار یا زائد افراد کا عوامی مقامات پر اکٹھا ہونا ممنوع قرار دیا گیا ہے۔

صوبے میں اسلحے کی نمائش اور اشتعال انگیز، نفرت آمیز یا فرقہ وارانہ مواد کی تقسیم پر مکمل پابندی عائد ہے۔ اسی طرح لاؤڈ اسپیکر کے استعمال پر بھی پابندی جاری رہے گی، البتہ اذان اور جمعے کے خطبے کے لیے اس کی اجازت ہوگی۔

تاہم شادی کی تقریبات، جنازے اور تدفین پر یہ پابندی لاگو نہیں ہوگی، جبکہ سرکاری فرائض سرانجام دینے والے اہلکار اور عدالتیں بھی اس حکم سے مستثنیٰ ہیں۔

محکمہ داخلہ کے مطابق یہ اقدامات امن و امان کی صورت حال برقرار رکھنے اور عوام کی جان و مال کے تحفظ کے لیے کیے گئے ہیں۔

 حکام کا کہنا ہے کہ موجودہ سکیورٹی خدشات کے باعث عوامی احتجاج اور دھرنے دہشت گردوں کے لیے آسان ہدف ثابت ہو سکتے ہیں، جبکہ شرپسند عناصر ایسے اجتماعات کا غلط فائدہ اٹھا کر ریاست مخالف سرگرمیوں کو آگے بڑھا سکتے ہیں۔