فرانسیسی کمانڈر کی تصدیق—6 اور 7 مئی کی رات بھارتی رافیل طیارے پاکستان نے مار گرائے، خرابی مشین میں نہیں پائلٹ میں تھی

امریکی صدر ٹرمپ اور امریکی کانگریس کے بعد اب فرانسیسی نیول ایئربیس کے کمانڈر کیپٹن یوگ لونے نے بھی اس بات کی تصدیق کردی ہے کہ 6 اور 7 مئی کی درمیانی شب پاکستان نے بھارتی فضائیہ کے رافیل طیارے مار گرائے تھے۔

فرانس کے شمال مغربی علاقے میں واقع اہم نیول ایئربیس کے کمانڈر کیپٹن لونے نے میڈیا سے گفتگو میں کہا کہ رافیل طیاروں میں کوئی تکنیکی خرابی نہیں تھی، اصل مسئلہ بھارتی پائلٹس کی تجربہ کارانہ کمزوری تھی۔ وہ گزشتہ 25 سال سے رافیل طیارے اڑا رہے ہیں اور 94 بحری جہازوں، 10 جوہری آبدوزوں اور 190 جنگی طیاروں کی نگرانی کرتے ہیں۔

انڈو پیسفک کانفرنس کے بین الاقوامی سیشن سے خطاب میں انہوں نے پاکستانی فضائیہ کی بے مثال صلاحیتوں کی تعریف کرتے ہوئے کہا کہ مئی 2025 کی جھڑپ میں بھارتی رافیلز چینی تکنیکی برتری کے باعث نہیں گرے، بلکہ پاکستان کی مضبوط دفاعی حکمتِ عملی اور مؤثر رسپانس نے انہیں نشانہ بنایا۔

کیپٹن لونے کا کہنا تھا کہ لڑائی انتہائی پیچیدہ تھی جس میں 140 سے زائد جنگی طیارے شامل تھے، اتنی بڑی فضائی سرگرمی میں اہداف کو نشانہ بنانا نسبتاً آسان ہوتا ہے مگر پاکستان نے صورتحال کو بھارت کے مقابلے میں کہیں بہتر انداز میں ہینڈل کیا۔

بھارتی مندوب نے ان کے بیان کو چین کا پروپیگنڈا قرار دے کر مداخلت کی، جسے کیپٹن لونے نے نظر انداز کردیا۔

رافیل کے ریڈار سسٹم کی ناکامی سے متعلق سوال کے جواب میں انہوں نے کہا کہ مسئلہ مشین کا نہیں بلکہ اسے استعمال کرنے کے طریقے کا تھا۔ رافیل ہر قسم کے جنگی حالات میں چینی طیاروں کا مقابلہ کر سکتا ہے، مگر سب کچھ پائلٹ کی صلاحیت پر منحصر ہے۔

انہوں نے مزید انکشاف کیا کہ بھارتی حکومت اب رافیل کے نیول ورژن میں دلچسپی رکھتی ہے جو ائیرکرافٹ کیریئر سے آپریٹ ہوتا ہے اور جوہری میزائل لے جانے کی صلاحیت رکھتا ہے—یہ ٹیکنالوجی دنیا میں فی الحال صرف فرانسیسی بحریہ کے پاس ہے۔

ماہرین کے مطابق پاک–بھارت فضائی جھڑپ کا یہ تجزیہ عالمی توجہ حاصل کر رہا ہے کیونکہ اس میں پائلٹس، طیاروں اور ائیر ٹو ائیر میزائلوں کی کارکردگی حقیقی جنگی ماحول میں پرکھی گئی، جو مستقبل کی ملٹری اسٹریٹجی کے لیے اہم اسباق فراہم کرتا ہے۔