ایتھوپیا کے آتش فشاں کی راکھ پاکستان کے بعد بھارت کی جانب بڑھ گئی

ایتھوپیا میں 12 ہزار سال بعد پھٹنے والے خاموش آتش فشاں سے نکلنے والی راکھ اب پاکستان کے بعد بھارت کی جانب بڑھ چکی ہے، جبکہ پاکستان کی فضائی حدود صاف ہو چکی ہیں۔

محکمہ موسمیات کے ترجمان انجم نذیر نے بتایا کہ راکھ کے بادل سندھ کے اوپر بحیرہ عرب سے گزرے اور شمالی علاقوں کو کوئی اثر نہیں ہوا۔ منگل کی صبح 10 بجے گوادر کے جنوب میں 45 ہزار فٹ کی بلندی پر راکھ دیکھی گئی تھی، جو عام سیٹلائٹ پر نظر نہیں آتی۔

 انہوں نے بتایا کہ پاکستان میں پہلی بار آتش فشاں کی راکھ کے لیے ایوی ایشن ایڈوائزری جاری کی گئی۔

دوسری جانب بھارتی محکمہ موسمیات کے مطابق راکھ کے اثرات دہلی، گجرات، راجستھان، پنجاب اور ہریانہ تک دیکھے گئے، اور راکھ کے بادل منگل کی شام ساڑھے سات بجے تک بھارت سے گزر جائیں گے۔ بھارتی محکمہ موسمیات نے کہا کہ راکھ کے بادل چین کی جانب بڑھ رہے ہیں۔