نادیہ خان کا بالی ووڈ پر وار: بھارتی فلم انڈسٹری اب مکمل طور پر نقالی پر چل رہی ہے

اداکارہ نادیہ خان نے بھارتی فلم انڈسٹری کو شدید تنقید کا نشانہ بناتے ہوئے کہا ہے کہ بالی ووڈ کی تخلیقی صلاحیت ختم ہوچکی ہے اور اب پوری انڈسٹری بیرونی مواد کی نقل پر چل رہی ہے۔

اپنے پروگرام میں فلم چوہدری کی پروڈیوسر نِیہا لاج سے گفتگو کرتے ہوئے نادیہ نے کہا کہ 2022 میں بننے والی پاکستانی فلم کی کہانی کو بالی ووڈ سنجے دت کے ذریعے دوبارہ بنانے جا رہا ہے، جو واضح کاپی ہے۔

نادیہ خان کا کہنا تھا کہ بھارت پر بین الاقوامی مواد کا جنون اس حد تک ہے کہ اب نہ معیاری فلمیں بن رہی ہیں، نہ اچھا میوزک سامنے آرہا ہے۔ 

انہوں نے کہا کہ بالی ووڈ حب الوطنی کے موضوعات پر فلمیں بنانے کی ہمت بھی نہیں رکھتا کیونکہ عوام اب ایسی کہانیوں کا مذاق اڑانے لگے ہیں، اسی لیے لیاری جیسے پاکستانی موضوعات کو اٹھایا جارہا ہے۔

انہوں نے چوہدری اسلم کو خراجِ تحسین پیش کرتے ہوئے کہا کہ وہ وقار اور اعتماد کی علامت تھے، جبکہ سنجے دت ایک بڑے اداکار ہونے کے باوجود شخصیت کے لحاظ سے چوہدری اسلم کے قریب بھی نہیں پہنچ سکتے۔