پی ٹی آئی کی کمیٹیوں سے دستبرداری سے عوامی احتساب متاثر، پی اے سی ون کے اجلاس معطل

پاکستان تحریک انصاف کی کمیٹیوں سے دستبرداری کی حکمت عملی کے باعث پنجاب اسمبلی میں پبلک اکاؤنٹس کمیٹی ون (پی اے سی ون) کے اجلاس کئی ماہ سے معطل ہیں۔

 اسمبلی ذرائع کے مطابق سابق اپوزیشن لیڈر احمد خان بھچر کی نااہلی کے بعد کمیٹی کے اجلاس رکے ہوئے تھے اور نئے اپوزیشن لیڈر کے تعین میں طویل تاخیر نے صورتحال کو مزید پیچیدہ بنا دیا۔

نئے اپوزیشن لیڈر معین ریاض قریشی نے تعیناتی کے بعد کمیٹی کے کسی اجلاس کو بلائے بغیر چیئرمین شپ سے استعفیٰ دے دیا، جو سپیکر پنجاب اسمبلی ملک محمد احمد خان کی منظوری کا منتظر ہے۔

 ذرائع کے مطابق سپیکر نے اپوزیشن کو استعفوں پر غور کے لیے وقت دیا ہوا ہے، تاہم اپوزیشن نے حتمی فیصلہ نہیں کیا۔ اس سیاسی حکمت عملی کے براہِ راست اثرات عوامی احتساب کے عمل پر پڑ رہے ہیں، جو کئی ماہ سے معطل ہے۔

 پنجاب میں پی اے سی ون کی چیئرمین شپ ہمیشہ اپوزیشن کے پاس رہی ہے، مگر موجودہ سیاسی جمود نے پارلیمانی نگرانی اور مالی شفافیت پر منفی اثر ڈالا ہے۔