خاتونِ اوّل آصفہ بھٹو زرداری: خواتین کی حفاظت اور حقوق یقینی بنانا ریاست کی ذمہ داری

اسلامی جمہوریہ پاکستان کی خاتونِ اوّل بی بی آصفہ بھٹو زرداری نے کہا ہے کہ خواتین کی آواز، ان کے حقوق اور خواب معاشرتی ترقی کے لیے نہایت اہم ہیں۔ یہ بات انہوں نے خواتین پر تشدد کے خاتمے کے بین الاقوامی دن پر جاری بیان میں کہی۔

آصفہ بھٹو زرداری نے کہا کہ جہاں خواتین خوف یا خاموشی کی زندگی گزاریں، وہاں معاشرہ ترقی نہیں کر سکتا۔ ریاستِ پاکستان تمام خواتین اور بچیوں کی عزت، حقوق اور حفاظت کے لیے پُرعزم ہے۔

خاتونِ اوّل نے انصاف کے لیے سزا سے بچ جانے کی ثقافت کے خاتمے، متاثرہ خواتین کے لیے بہتر معاونت اور ہر سطح پر جوابدہی کو ضروری قرار دیا۔

 انہوں نے مزید کہا کہ ہمیں تعصب کے مقابلے میں احترام، خاموشی کے مقابلے میں ہمت اور غفلت کے مقابلے میں جوابدہی کو چننا ہو گا تاکہ آئندہ نسلوں کے لیے محفوظ اور برابر معاشرہ قائم کیا جا سکے۔

آصفہ بھٹو زرداری نے کہا کہ پاکستان کی ترقی خواتین کے لیے محفوظ ماحول سے مشروط ہے اور تمام شہری، ادارے اور کمیونیٹیز خواتین پر تشدد کے خاتمے کے لیے متحد رہیں۔ انہوں نے زور دیا کہ ہر عورت اور بچی کو خوف سے آزاد اور مکمل مواقع کے ساتھ زندگی گزارنے کا حق حاصل ہونا چاہیے۔