میجر محمد اکرم نشانِ حیدر کی 54ویں یومِ شہادت پر پاک فوج کا خراجِ تحسین

فیلڈ مارشل اور چیف آف آرمی اسٹاف و چیف آف ڈیفنس فورسز سید عاصم منیر، چیف آف نیول اسٹاف ایڈمرل نوید اشرف اور ایئر چیف مارشل ظہیر احمد بابر سدھو نے 1971 کی جنگ کے ہیرو، شہید میجر محمد اکرم نشانِ حیدر کو ان کی 54ویں یومِ شہادت پر خراجِ عقیدت پیش کیا۔

 آئی ایس پی آر کے مطابق پاک فوج نے اس دن کو شدید عقیدت اور احترام کے ساتھ منایا۔

میجر محمد اکرم شہید نے 1971 میں مشرقی پاکستان کے ہلی سیکٹر میں 4 فرنٹیئر فورس رجمنٹ کی قیادت کرتے ہوئے بے مثال بہادری کا مظاہرہ کیا۔

 3 دسمبر 1971 کو انہیں دشمن کے مضبوط ٹھکانوں پر حملہ کرنے کا مشن سونپا گیا، جس دوران انہوں نے دشمن کے تین ٹینک تباہ کیے اور شدید زخمی ہونے کے باوجود بہادری کا مظاہرہ کیا۔ آخرکار 5 دسمبر 1971 کو وہ شہادت کے رتبے پر فائز ہوئے۔

میجر محمد اکرم کی قربانی آج بھی پاک فوج کے عزم اور وطن سے محبت کی علامت ہے۔ 

افواج پاکستان نے اس دن کو شہداء کی قربانیوں کو یاد کرنے اور قوم کی حفاظت کے عزم کو تازہ کرنے کے لیے منایا۔ آئی ایس پی آر کے مطابق ان کی قربانی مادرِ وطن کے دفاع کی روشن مثال اور قوم کے لیے عزم و حوصلے کا درس ہے۔