ایلا واڈیا، محمد علی جناح کی نسل سے تعلق رکھنے والی، پیرس کے معروف ڈیبیوٹنٹ بال میں شامل ہوئیں

پاکستان کے بانی محمد علی جناح کی نسل سے تعلق رکھنے والی ایلا واڈیا نے اس ہفتے پیرس میں منعقد ہونے والے معروف ڈیبیوٹنٹ بال میں شرکت کر کے عالمی توجہ حاصل کی۔

پیرس کے تاریخی محل میں منعقد ہونے والی اس سالانہ تقریب میں دنیا بھر کے بااثر خاندانوں کی 20 نوجوان خواتین کو مدعو کیا جاتا ہے تاکہ وہ رقص اور سماجی سرگرمیوں کے ذریعے عالمی سماجی منظرنامے میں قدم رکھ سکیں۔ 

شرکاء کے لیے اعلیٰ فیشن ہاؤسز کے خصوصی تیار کردہ گاؤنز فراہم کیے جاتے ہیں۔

 اس موقع پر ایلا واڈیا نے ایلی صعب کا خصوصی ڈیزائن کردہ شاندار گاؤن زیبِ تن کیا۔

ایلا کا تعلق بانی پاکستان محمد علی جناح کی بیٹی دینا واڈیا کی نسل سے ہے، جنہوں نے نیول واڈیا سے شادی کی تھی۔

 ان کے بیٹے نُسلی واڈیا بھارت کی صنعتی اور کاروباری دنیا کے معروف افراد میں شامل ہیں اور واڈیا گروپ کی قیادت کرتے رہے ہیں۔

 ایلا کو اکثر جناح کی بیٹی کی پوتی کے طور پر جانا جاتا ہے۔

1958 میں قائم ہونے والا ڈیبیوٹنٹ بال دنیا کے سب سے معزز سماجی تقریبات میں شمار ہوتا ہے، جسے بعض حلقے نوعمروں کا ’میٹ گالا‘ بھی کہتے ہیں۔

 اس سال کے شرکاء میں شاہی خاندانوں، کاروباری گھرانوں اور ہالی ووڈ کی نوجوان خواتین شامل تھیں۔

 ایونٹ کی آرگنائزر اوفیلی رینوآر کے مطابق اس تقریب کا مقصد روایتی ڈیبیوٹنٹ بالز کے برخلاف نوجوان خواتین کی انفرادی صلاحیتوں، انداز اور اعتماد کو اجاگر کرنا ہے۔

ایلا واڈیا کی شرکت نہ صرف پاکستانی اور بھارتی نژاد لوگوں کی دلچسپی بڑھانے کا باعث بنی بلکہ جناح خاندان کی نئی نسل کا عالمی سماجی منظرنامے پر منفرد تعارف بھی کرایا۔