امریکی کانگریس کے 44 ڈیموکریٹک اراکین نے پاکستانی حکام پر پابندیوں کا مطالبہ کیا

امریکہ کی ایوانِ نمائندگان کے 44 ڈیموکریٹک ارکان نے وزیر خارجہ مارکو روبیو کو خط لکھ کر پاکستانی حکام پر فوری پابندیاں عائد کرنے کا مطالبہ کیا ہے، جس کی بنیاد پاکستان میں “جبر کی بڑھتی ہوئی مہم اور انسانی حقوق کے بگڑتے ہوئے بحران” کو قرار دیا گیا ہے۔

اس کوشش کی قیادت کانگریس وومن پرمیلا جیبال اور کانگریس مین گریگ کیزار کر رہے ہیں، جبکہ خط پر الہان عمر، رشیدہ طلیب سمیت دیگر ارکان نے دستخط کیے ہیں، جو فلسطینی اور دیگر مسلم مسائل پر سرگرم رہتے ہیں۔

اراکین نے مطالبہ کیا کہ پاکستانی حکام پر ویزا پابندیاں اور اثاثے منجمد کرنے کے اقدامات کیے جائیں جو امریکی شہریوں، رہائشیوں، اور ان کے اہلِ خانہ کو دھمکانے یا ہراساں کرنے میں ملوث ہیں، خاص طور پر وہ افراد جو پاکستان کی فوجی اسٹیبلشمنٹ پر تنقید کرتے ہیں۔

خط میں صحافیوں کے ہراسانی، سیاسی مخالفین کی بلاوجہ حراست، خواتین، مذہبی اقلیتیں اور بلوچستان کی نسلی برادریوں پر غیر متناسب مظالم کا ذکر کیا گیا۔

 خاص کیسز میں تحقیقی صحافی احمد نورانی کی رپورٹنگ کے بعد ان کے بھائی کی حراست شامل ہے۔

اراکین نے 2024 کے انتخابات میں بدعنوانیوں پر بھی تشویش ظاہر کی اور واشنگٹن سے مطالبہ کیا کہ وہ عالمی میگنیٹسکی پابندیاں، ٹارگٹڈ ویزا پابندیاں، اور اثاثوں کی منجمد کاری نافذ کرے تاکہ انسانی حقوق کو یقینی بنایا جا سکے اور امریکی شہریوں کو سرحد پار خطرات سے تحفظ فراہم ہو۔

خط میں سابق وزیراعظم عمران خان اور دیگر سیاسی قیدیوں کی رہائی کا بھی مطالبہ کیا گیا۔

 ارکان نے کہا کہ یہ اقدامات انسانی حقوق کے لیے امریکی عزم کو مضبوط کریں گے اور علاقائی استحکام کو فروغ دیں گے۔

اس سے قبل اس سال ایوان میں 50 سے زائد اراکین نے ’پاکستان فریڈم اینڈ اکاؤنٹیبلٹی ایکٹ‘ (HR 5271) پیش کیا تھا، جو پاکستان میں جمہوریت کو نقصان پہنچانے والے افراد کے خلاف قانونی پابندیوں کی سفارش کرتا ہے اور اس وقت فارین افیئرز کمیٹی میں زیرِ غور ہے۔