واٹس ایپ میں نیا ’چیٹ ہسٹری شیئرنگ‘ فیچر متعارف، نئے ممبران پچھلی گفتگو دیکھ سکیں گے

واٹس ایپ نے ایک نیا فیچر ’چیٹ ہسٹری شیئرنگ‘ ٹیسٹ کرنا شروع کر دیا ہے، جس کے ذریعے گروپ میں شامل ہونے والے نئے ممبران پچھلی گفتگو تک رسائی حاصل کر سکیں گے۔

ابتدائی تفصیلات کے مطابق نئے ممبران کو تقریباً 24 گھنٹے کی حالیہ چیٹ ہسٹری دستیاب ہوگی، اور پیغامات کی تعداد زیادہ سے زیادہ 1000 رکھی جا سکتی ہے تاکہ ایپ کی کارکردگی متاثر نہ ہو۔

گروپ ایڈمنز کے پاس اختیار ہوگا کہ وہ اس فیچر کو فعال یا غیر فعال کریں، یعنی گروپ کی پالیسی کے مطابق یہ فیصلہ کر سکتے ہیں کہ نئے ممبران کو ہسٹری دکھائی جائے یا نہیں۔

واٹس ایپ کے مطابق شیئر کی جانے والی تمام چیٹ ہسٹری اینڈ ٹو اینڈ انکرپشن کے تحت محفوظ رہے گی، اور نئے ممبران کے شامل ہوتے ہی پیغامات خودکار طور پر دوبارہ انکرپٹ ہو جائیں گے، جس سے صارفین کی رازداری برقرار رہے گی۔

یہ فیچر ابھی ترقی اور آزمائش کے مراحل میں ہے اور عام صارفین کے لیے دستیاب نہیں ہے۔