ڈی ایس پی کی جانب سے اغوا کا ڈرامہ بے نقاب، بیوی اور بیٹی کے قتل کا اعتراف

ڈی ایس پی عثمان حیدر کی اہلیہ اور بیٹی کے مبینہ اغوا کا معمہ حل ہو گیا، جہاں تفتیش کے دوران انکشاف ہوا کہ دونوں کے قتل میں خود ڈی ایس پی عثمان حیدر ملوث ہے۔ 

پولیس نے ملزم کو گرفتار کر لیا ہے، جس نے اعتراف جرم بھی کر لیا۔

پولیس ذرائع کے مطابق عثمان حیدر نے گھریلو تنازع کے باعث اپنی بیوی اور بیٹی کو فائرنگ کرکے قتل کیا اور بعد ازاں اغوا کا ڈرامہ رچاتے ہوئے تھانہ برکی میں ایف آئی آر درج کروائی۔

 مقتولہ بیٹی کی لاش کاہنہ جبکہ بیوی کی لاش شیخوپورہ سے برآمد ہوئی۔

تحقیقات میں سامنے آیا کہ عثمان حیدر نے دو شادیاں کر رکھی تھیں اور دوسری شادی کے بعد گھریلو جھگڑے شدت اختیار کر گئے تھے۔

 پولیس کا کہنا ہے کہ مزید تفتیش جاری ہے جس میں مزید حقائق سامنے آنے کا امکان ہے۔