صبا قمر نے سستی شہرت کے خواہش مندوں کو کرارا جواب دے دیا

پاکستانی شوبز انڈسٹری کی عالمی شہرت یافتہ اداکارہ صبا قمر نے اپنے نام کا غلط استعمال کرنے اور سستی شہرت حاصل کرنے والوں کو کھری کھری سنا دی۔

حال ہی میں ایک درخواست دائر کی گئی تھی جس میں صبا قمر پر بغیر اجازت پولیس یونیفارم پہننے کا مقدمہ درج کرنے کی گزارش کی گئی تھی، جس پر اداکارہ نے اپنا واضح موقف پیش کیا ہے۔

انسٹاگرام پر انہوں نے اس خبر کا سکرین شاٹ شیئر کرتے ہوئے متعلقہ حکام کو بھیجی گئی درخواست کا ذکر کیا، جو 31 ستمبر 2021 کو لاہور آپریشنز کے ڈپٹی انسپکٹر جنرل کے نام لکھی گئی تھی۔ 

اس درخواست میں ’پاکستان کی امیج کی بہتری کے لیے ڈی جی پی آر پنجاب پروجیکٹ‘ کے لیے پولیس یونیفارم خریدنے اور استعمال کرنے کی اجازت مانگی گئی تھی۔

صبا قمر نے اس پٹیشن کو شہرت کے لیے استعمال کرنے کی کوشش کو ’پبلسٹی‘ قرار دیتے ہوئے ناقدین سے کہا کہ ’براہ کرم شہرت کے لیے کسی اور کو ڈھونڈیں، کیونکہ آج جو کچھ میرے پاس ہے وہ محنت کا نتیجہ ہے۔‘

انہوں نے مزید کہا کہ ناقدین کو چاہیے کہ وہ اپنے سفر پر توجہ دیں کیونکہ ان کا وقت بھی آئے گا۔