پاکستان اور برازیل کی ڈیری و لائیو اسٹاک شعبے میں تاریخی شراکت داری، جدید ٹیکنالوجی متعارف کروانے پر اتفاق

ڈیری اور لائیو اسٹاک کے شعبے میں سرمایہ کاری کو نئی جہت مل گئی ہے، جس کے تحت پاکستان اور برازیل کے درمیان تزویراتی شراکت داری میں تاریخی پیش رفت سامنے آئی ہے۔

وفاقی وزیرِ قومی غذائی تحفظ رانا تنویر حسین اور برازیلی سفیر کی اعلیٰ سطحی ملاقات میں دونوں ممالک نے لائیوسٹاک، ڈیری اور گوشت کی صنعت میں تعاون کو بڑھانے اور شراکت داری کو مزید گہرا کرنے پر اتفاق کیا۔

ملاقات میں گوشت پروسیسنگ، فیڈ لاٹ فَیٹننگ اور ٹریس ایبلٹی سسٹم کی بہتری کے لیے مشترکہ ورکنگ گروپ قائم کرنے پر غور کیا گیا۔

 ڈیری شعبے میں جدید کاری کے لیے برازیل کی اعلیٰ جینیٹکس اور جدید ٹیکنالوجی پاکستان میں متعارف کرانے پر بھی اتفاق ہوا۔

ماہرین کے تبادلے، تربیتی پروگرامز اور پاکستانی پروفیشنلز کی برازیل میں اعلیٰ سطحی ٹریننگ پر بھی باہمی اتفاق رائے حاصل کیا گیا۔

ماہرین کا کہنا ہے کہ لائیو اسٹاک اور ڈیری اصلاحات نہ صرف غذائی تحفظ کو مستحکم کریں گی بلکہ نئے روزگار کے مواقع پیدا کریں گی اور پاکستان کی برآمدات کو بھی فروغ دیں گی۔