پاکستان کا صومالیہ کی خودمختاری اور علاقائی سالمیت کی غیر متزلزل حمایت کا اعادہ

پاکستان نے صومالیہ کی خودمختاری اور علاقائی سالمیت کے لیے اپنی غیر متزلزل حمایت کا ایک بار پھر اعادہ کیا ہے۔

ترجمان دفتر خارجہ کے مطابق نائب وزیراعظم اور وزیر خارجہ اسحاق ڈار نے صومالیہ کے وزیر خارجہ عبدالسلام علی سے ٹیلیفونک رابطہ کیا۔

گفتگو کے دوران اسحاق ڈار نے ایسی کسی بھی کوشش کی سخت مذمت کی جو صومالیہ کے وقار، خودمختاری یا علاقائی سالمیت کو نقصان پہنچانے کی غرض سے کی جائے۔

صومالی وزیر خارجہ عبدالسلام علی نے پاکستان کی مسلسل اور اصولی حمایت پر شکریہ ادا کرتے ہوئے کہا کہ پاکستان کا کردار صومالیہ کے لیے انتہائی اہمیت کا حامل ہے۔

اس موقع پر اسحاق ڈار نے یقین دہانی کرائی کہ پاکستان اقوام متحدہ کی سلامتی کونسل سمیت تمام متعلقہ بین الاقوامی فورمز پر صومالیہ کی مکمل حمایت جاری رکھے گا۔