اسرائیل کے صومالی لینڈ کو تسلیم کرنے پر سلامتی کونسل کا ہنگامی اجلاس طلب

اسرائیل کی جانب سے صومالی لینڈ کو تسلیم کرنے کے اعلان پر اقوام متحدہ کی سلامتی کونسل کا ہنگامی اجلاس طلب کر لیا گیا ہے۔

عرب میڈیا کے مطابق صومالیہ کی باضابطہ درخواست پر سلامتی کونسل کا ہنگامی اجلاس پیر کے روز منعقد ہوگا۔

اس سے قبل اسرائیل کے اس اقدام پر پاکستان سمیت متعدد اسلامی ممالک کی جانب سے شدید مذمت کرتے ہوئے مشترکہ اعلامیہ جاری کیا گیا تھا۔

اعلامیے میں کہا گیا کہ اسرائیل کا صومالی لینڈ کو تسلیم کرنا بین الاقوامی قوانین کی صریح خلاف ورزی ہے اور یہ اقدام صومالیہ کی وحدت، خودمختاری اور علاقائی سالمیت کو نقصان پہنچانے کے مترادف ہے۔

مشترکہ اعلامیے میں خبردار کیا گیا کہ اسرائیلی اقدام افریقہ کے ہارن اور بحیرہ احمر کے خطے میں امن و استحکام کے لیے سنگین خطرہ بن سکتا ہے۔

او آئی سی وزرائے خارجہ کے مشترکہ اعلامیے میں پاکستان، فلسطین، قطر، سعودی عرب، صومالیہ اور سوڈان شامل ہیں، جبکہ سعودی عرب نے بھی صومالی سرزمین پر کسی نئے ملک کے قیام کو تسلیم کرنے کے اسرائیلی اعلان کو مسترد کر دیا۔

اعلامیے میں صومالیہ کی خودمختاری، قومی وحدت اور علاقائی استحکام کی مکمل حمایت کا اعادہ کیا گیا۔

علاوہ ازیں عرب لیگ، خلیج تعاون کونسل، افریقی یونین، یورپی یونین اور دیگر کئی ممالک و تنظیموں نے بھی اسرائیلی اقدام کی سخت مذمت کی ہے۔