شدید دھند، سینٹرل ریجن میں متعدد موٹرویز ٹریفک کے لیے بند

سینٹرل ریجن میں شدید دھند کے باعث مختلف مقامات پر موٹرویز کو عارضی طور پر ٹریفک کے لیے بند کر دیا گیا ہے۔

موٹروے پولیس کے ترجمان کے مطابق موٹروے ایم۔2 لاہور سے کوٹ مومن تک دھند کے باعث بند ہے، جبکہ موٹروے ایم۔3 فیض پور سے درخانہ اور موٹروے ایم۔4 پنڈی بھٹیاں سے خانیوال تک ٹریفک معطل کر دی گئی ہے۔

ترجمان نے مزید بتایا کہ لاہور۔سیالکوٹ موٹروے ایم۔11 بھی دھند کے باعث بند کر دی گئی ہے۔

اس کے علاوہ قومی شاہراہ پر لاہور، پتوکی، اوکاڑہ اور ساہیوال کے علاقوں میں دھند چھائی ہوئی ہے، جبکہ چیچہ وطنی، اقبال نگر، میاں چنوں، خانیوال، ملتان اور بہاولپور میں بھی حدِ نگاہ شدید متاثر ہو رہی ہے۔

موٹروے پولیس کے مطابق موٹرویز کی بندش کا مقصد شہریوں کی جان و مال کا تحفظ یقینی بنانا ہے، جبکہ حالات بہتر ہوتے ہی سڑکوں کو دوبارہ کھول دیا جائے گا۔