استاد راحت فتح علی خان کی صاحبزادی ماہین خان کی بارات، تصاویر اور ویڈیوز سوشل میڈیا پر وائرل

عالمی شہرت یافتہ پاکستانی کلاسیکل اور غزل گلوکار استاد راحت فتح علی خان ان دنوں اپنی صاحبزادی ماہین خان کی شادی کی تقریبات کے باعث خبروں کی زینت بنے ہوئے ہیں۔

 اب ماہین خان کی بارات کی تصاویر اور ویڈیوز بھی سوشل میڈیا پر تیزی سے وائرل ہو رہی ہیں۔

ماہین خان کی شادی کی تقریبات لاہور میں منعقد ہوئیں، جن میں نکاح، مایوں، مہندی اور بارات شامل تھیں۔

 ان تقریبات میں قریبی رشتہ داروں، عزیز و اقارب اور دوست احباب نے شرکت کی۔ مایوں کی تصاویر منظرِ عام پر آنے کے بعد سوشل میڈیا پر بعض صارفین کی جانب سے ماہین خان کے لباس پر تنقید بھی کی گئی تھی۔

بعد ازاں مہندی کی نجی تقریب کی تصاویر اور ویڈیوز بھی سامنے آئیں، جس میں شوبز سے تعلق رکھنے والی چند معروف شخصیات نے بھی شرکت کی۔

 بارات کے موقع پر ماہین خان روایتی سرخ پاکستانی دلہن کے لباس میں ملبوس نظر آئیں، جس کے ساتھ انہوں نے ونٹیج طرز کے بھاری زیورات زیب تن کیے۔

دولہا کالی شیروانی میں جلوہ گر ہوا، جبکہ استاد راحت فتح علی خان اور شاہ زمان خان ہلکی سنہری شیروانی میں دکھائی دیے۔

 اس تقریب میں نامور اداکار فواد خان بھی بطور مہمان خصوصی شریک ہوئے، جو مدھم سنہری شیروانی میں خوشگوار نظر آئے۔