میر سرفراز بگٹی کو بگٹی قبائل کا نیا چیف مقرر، قبائلی روایات کے مطابق روایتی پگڑی پہنائی گئی

بلوچستان کے تاریخی قبائلی مرکز بیکڑ میں بگٹی قبائل کے اہم جرگے کے بعد وزیر اعلیٰ بلوچستان میر سرفراز بگٹی کو متفقہ طور پر بگٹی قبائل کا نیا چیف مقرر کر دیا گیا۔

 اس منصب پر سابقہ چیف وڈیرہ محمد شریف بگٹی فائز تھے، جن کی وفات کے بعد یہ عہدہ خالی تھا۔

تقریب میں بگٹی قبائل کی مختلف شاخوں کے سربراہان اور معتبرین نے شرکت کی، اور میر سرفراز بگٹی کو روایتی پگڑی پہنائی گئی جو قیادت اور اجتماعی ذمہ داری کی علامت ہے۔

 وزیر اعلیٰ نے کہا کہ یہ پگڑی محض اعزاز نہیں بلکہ ایک بڑی امانت ہے اور وہ کبھی قبائل کو مایوس نہیں کریں گے۔

میر سرفراز بگٹی نے بگٹی عوام کو درپیش مسائل کے حل، تعلیم کے فروغ، اور بلوچ نوجوانوں کو قومی دھارے میں شامل کرنے کا عزم بھی ظاہر کیا۔

 انہوں نے واضح کیا کہ قبائل ہمیشہ پاکستان کے استحکام اور سلامتی کے ساتھ کھڑے رہیں گے۔

سیاسی تجزیہ کاروں کے مطابق وزیر اعلیٰ کے بطور بگٹی چیف تقرر سے قبائلی نظام اور صوبائی سیاست کے درمیان مضبوط ربط قائم ہو سکتا ہے، جس کے اثرات بلوچستان میں امن، مفاہمت اور ترقی پر مرتب ہوں گے۔