شان مسعود نے پریزیڈنٹ ٹرافی میں تیز ترین فرسٹ کلاس ڈبل سنچری بنا کر قومی ریکارڈ توڑ دیا

پاکستان کے ٹیسٹ ٹیم کے کپتان شان مسعود نے پریزیڈنٹ ٹرافی کے پہلے روز شاندار بیٹنگ کرتے ہوئے 36 سال کی عمر میں تیز رفتار فرسٹ کلاس ڈبل سنچری بنا کر نیا قومی ریکارڈ قائم کر دیا۔

کراچی میں ایس این جی پی ایل کی نمائندگی کرتے ہوئے شان مسعود نے ساحر ایسوسی ایٹس کے خلاف صرف 177 گیندوں پر ڈبل سنچری مکمل کی۔

 اس سے قبل پاکستان کا یہ ریکارڈ سابق کپتان انضمام الحق کے پاس تھا، جنہوں نے 1992ء میں آکسفورڈ اینڈ کیمبرج یونیورسٹی کے خلاف 188 گیندوں پر ڈبل سنچری بنائی تھی۔

شان مسعود کی یہ ڈبل سنچری نہ صرف قومی بلکہ پاکستانی سرزمین پر بھی سب سے تیز ترین فرسٹ کلاس ڈبل سنچری ہے۔ 

پہلے دن کے اختتام پر وہ 185 گیندوں پر 212 رنز کے ساتھ ناٹ آؤٹ ہیں۔ 

اس سے قبل یہ ریکارڈ بھارت کے وریندر سہواگ کے پاس تھا، جنہوں نے 2006ء کے لاہور ٹیسٹ میں 182 گیندوں پر ڈبل سنچری بنائی تھی۔