آئی ایم ایف کا پاکستان میں لوکل ہائبرڈ گاڑیوں اور بائیکس پر سیلز ٹیکس چھوٹ ختم کرنے کا مطالبہ

عالمی مالیاتی ادارے (آئی ایم ایف) نے پاکستان میں مقامی سطح پر تیار کی جانے والی ہائبرڈ الیکٹرک گاڑیوں اور بائیکس پر دی گئی سیلز ٹیکس چھوٹ ختم کرنے کا مطالبہ کر دیا ہے۔

 ذرائع کے مطابق آئی ایم ایف نے آئندہ مالی سال سے ان گاڑیوں کو 18 فیصد کی معیاری شرح کے مطابق سیلز ٹیکس کے دائرے میں لانے پر زور دیا ہے۔

دستاویزات کے مطابق اس وقت لوکل مینوفیکچرڈ ہائبرڈ الیکٹرک گاڑیوں کو سیلز ٹیکس کے آٹھویں شیڈول کے تحت رعایت حاصل ہے، تاہم آئی ایم ایف نے وزارتِ صنعت و پیداوار کے ساتھ مذاکرات کے دوران اس رعایت کو ختم کرنے کی تجویز دی ہے۔

ذرائع کا کہنا ہے کہ موجودہ قوانین کے تحت 1800 سی سی تک کی مقامی ہائبرڈ گاڑیوں پر 8.5 فیصد جبکہ 1801 سے 2500 سی سی تک کی گاڑیوں پر 12.75 فیصد سیلز ٹیکس عائد ہے۔

 تاہم آئی ایم ایف چاہتا ہے کہ ہائبرڈ گاڑیوں اور بائیکس کو آٹھویں شیڈول سے نکال کر نارمل ٹیکس رجیم میں شامل کیا جائے۔

دستاویزات میں بتایا گیا ہے کہ لوکل مینوفیکچرڈ ہائبرڈ وہیکلز کو 30 جون 2026 تک سیلز ٹیکس میں چھوٹ حاصل ہے، لیکن آئی ایم ایف کے مطالبے کی صورت میں آئندہ مالی سال سے یہ رعایت ختم ہو سکتی ہے۔

 اس اقدام سے ہائبرڈ گاڑیوں اور بائیکس کی قیمتوں میں اضافے کا خدشہ ہے، جس سے صارفین اور مقامی آٹو انڈسٹری دونوں متاثر ہو سکتے ہیں۔